புதிய ரக ஏசி தயாரிப்புகளை அறிமுகப்படுத்திய புளூ ஸ்டார்

சென்னை: குளிர்விப்பு சாதன உற்பத்தியில் முன்னணி நிறுவனமான Blue Star Limited, 2026 கோடைகாலத்தை முன்னிட்டு புதிய ரக அறை ஏசி (Room Air Conditioners) தயாரிப்புகளை அறிமுகப்படுத்துவதாக அறிவித்துள்ளது. இந்தியாவின் குடியிருப்பு மற்றும் வணிக குளிர்விப்பு சந்தையில் தனது நிலையை மேலும் வலுப்படுத்தும் நோக்கில் இந்த தயாரிப்புகள் வெளியிடப்பட்டுள்ளதாக நிறுவனம் தெரிவித்துள்ளது.

இந்த புதிய தயாரிப்பு வரிசையில் மொத்தம் 125 மாடல்கள் இடம்பெற்றுள்ளன. வாடிக்கையாளர்களின் பல்வேறு தேவைகள் மற்றும் பயன்பாட்டை கருத்தில் கொண்டு இன்வெர்ட்டர், பிக்ஸ்ட் ஸ்பீடு மற்றும் விண்டோ ஏசிகள் உள்ளிட்ட பல்வேறு வகைகள் அறிமுகப்படுத்தப்பட்டுள்ளன. அனைத்து மாடல்களும் 2026 ஜனவரி 1 முதல் அமலுக்கு வந்த Bureau of Energy Efficiency (BEE) அமைப்பின் புதிய எரிசக்தி திறன் தரநிலைகளுக்கு ஏற்ப வடிவமைக்கப்பட்டுள்ளதாக நிறுவனம் தெரிவித்துள்ளது.

இந்தியாவில் வீடுகளுக்கான ஏசி பயன்பாடு கடந்த சில ஆண்டுகளில் வேகமாக அதிகரித்து வருகிறது. அதிகரித்து வரும் வருமானம், நகரமயமாக்கல் மற்றும் கடும் வெப்பநிலை ஆகிய காரணங்களால் இந்தத் துறை தொடர்ந்து வளர்ச்சி கண்டுவருகிறது. தற்போது ஆண்டுக்கு சுமார் 14 மில்லியன் யூனிட்டுகள் விற்பனையாகும் நிலையில், 2030 நிதியாண்டிற்குள் இது 30 மில்லியன் யூனிட்டுகளாக உயருமென கணிக்கப்பட்டுள்ளது. குறிப்பாக டயர்–3, 4 மற்றும் 5 நகரங்களில் ஏசி பயன்பாடு வேகமாக அதிகரித்து வருவது குறிப்பிடத்தக்கது.

புளூ ஸ்டார் அறிமுகப்படுத்தியுள்ள தயாரிப்புகளில் ‘ஐகோனியா’ (Iconia) என்ற பிரீமியம் ஏசி மாடல் ‘மிட்நைட் சில்வர்’ நிறத்தில் அறிமுகமாகியுள்ளது. மேலும் ‘சூப்பர் எனர்ஜி-எஃபிஷியன்ட்’, ‘ஹெவி-டியூட்டி’, ‘ஹாட் & கோல்ட்’ மற்றும் ‘ஆன்டி-வைரஸ் தொழில்நுட்பம்’ கொண்ட பல புதிய மாடல்களையும் நிறுவனம் வெளியிட்டுள்ளது.

இதில் இடம்பெற்றுள்ள ‘சூப்பர் எனர்ஜி-எஃபிஷியன்ட்’ ஏசிகள் ‘டைனமிக் டிரைவ்’ தொழில்நுட்பத்துடன் வடிவமைக்கப்பட்டுள்ளன. இதன் மூலம் குறைந்த மின்சாரத்தில் அதிக குளிர்ச்சியை வழங்க முடியும். 1TR இன்வெர்ட்டர் ஸ்பிளிட் ஏசிகள் 6.25 என்ற ISEER மதிப்பைப் பெற்றுள்ளன. இது சாதாரண 3-ஸ்டார் இன்வெர்ட்டர் ஏசிகளை விட சுமார் 45 சதவீதம் அதிக எரிசக்தி திறன் கொண்டதாகும்.

‘ஹெவி-டியூட்டி’ ஏசிகள் 56 டிகிரி செல்சியஸ் வரை அதிக வெப்பநிலையிலும் திறம்பட செயல்படும் வகையில் வடிவமைக்கப்பட்டுள்ளன. இவை 55 அடி தூரம் வரை காற்றை வீசும் திறன் கொண்டதாகும். அதேபோல் ‘ஹாட் & கோல்ட்’ ஏசிகள் -15 டிகிரி செல்சியஸ் வரை குறைந்த வெப்பநிலையிலும் இயங்கக்கூடியதாக உருவாக்கப்பட்டுள்ளன.

மேலும் சில மாடல்களில் ஆன்டி-வைரஸ் தொழில்நுட்பம், மல்டி-லேயர் வடிகட்டுதல், செல்ஃப்-கிளீன் வசதி மற்றும் துருப்பிடிப்பைத் தடுக்கும் ‘நேனோ புளூ புரோடெக்ட்’ தொழில்நுட்பம் போன்ற அம்சங்களும் இடம்பெற்றுள்ளன. இதில் சுமார் 50 மாடல்கள் ஸ்மார்ட் வைஃபை வசதியுடன், செயற்கை நுண்ணறிவு (AI) அடிப்படையிலான அடாப்டிவ் கூலிங், குரல் கட்டுப்பாடு மற்றும் எரிசக்தி மேலாண்மை வசதிகளையும் கொண்டுள்ளன.

புதிய தயாரிப்புகளுக்காக இன்வெர்ட்டர் கம்ப்ரஸருக்கு வாழ்நாள் உத்தரவாதமும், PCB-களுக்கு 5 ஆண்டு உத்தரவாதமும் வழங்கப்படுவதாக நிறுவனம் தெரிவித்துள்ளது.

அதிகரித்து வரும் தேவையை கருத்தில் கொண்டு புளூ ஸ்டார் தனது உற்பத்தித் திறனையும் விரிவுபடுத்தியுள்ளது. தற்போது ஆண்டுக்கு 1.4 மில்லியன் யூனிட்டுகளாக உள்ள உற்பத்தித் திறன் விரைவில் 1.8 மில்லியன் யூனிட்டுகளாக உயர்த்தப்பட உள்ளது. ஆந்திரப் பிரதேசத்தின் Sri City மற்றும் Himachal Pradesh மாநிலங்களில் உள்ள தொழிற்சாலைகளில் ஏசி உற்பத்தி நடைபெறுகிறது.

மேலும், புளூ ஸ்டார் நிறுவனம் இந்தியாவின் 900 நகரங்களில் 10,000-க்கும் மேற்பட்ட விற்பனை நிலையங்களையும், 2,100-க்கும் மேற்பட்ட சேவைப் பங்காளர்களையும் கொண்ட விரிவான சேவை மற்றும் விநியோக வலையமைப்பை கொண்டுள்ளது.

இதுகுறித்து சென்னையில் நடைபெற்ற செய்தியாளர் சந்திப்பில் B. Thiagarajan கூறுகையில், “இந்தியாவில் குளிர்விப்பு சாதனங்களுக்கான தேவை வேகமாக அதிகரித்து வருகிறது. எதிர்காலத்தில் சுமார் 150 மில்லியன் குடும்பங்கள் ஏசி வாங்கும் திறனைப் பெறும் என்று எதிர்பார்க்கப்படுகிறது. மாறிவரும் வாடிக்கையாளர் தேவைகளுக்கு ஏற்ப எங்களின் புதிய தயாரிப்புகள் உருவாக்கப்பட்டுள்ளன. குடியிருப்பு மற்றும் வணிகத் துறைகளில் உருவாகும் வாய்ப்புகளை பயன்படுத்தி அடுத்த கட்ட வளர்ச்சியை நோக்கி புளூ ஸ்டார் முன்னேற தயாராக உள்ளது,” என்றார்.